Լեւոն Տեր-Պետրոսյան. «Ստեղծվել է մի հասարակություն, որը Ս.Սարգսյանը եւ Ռ.Քոչարյանը չեն կարող կառավարել»

Էմմա Գաբրիելյան
Լեւոն Տեր-Պետրոսյանի
հարցադրումները իրավաբանորեն ապացուցված են
ՀՀ Առաջին նախագահ Լեւոն Տեր-Պետրոսյանը մարտի 11-ի երեկոյան իր առանձնատանը մամուլի ասուլիս էր հրավիրել մարտի 8-ին Սահմանադրական դատարանի կայացրած որոշման առիթով: Նախ նա հրապարակեց իր հայտարարությունը, որում ուշադրություն էր հրավիրել այն փաստին, որ ՍԴ-ն իր որոշմամբ փաստացի խուսափել է անդրադառնալ անցած ընտրությունների օրինականությունը կասկածի տակ դնող երկու «ամենաառարկելի հիմքերին»` վարչապետի գրանցմանը որպես նախագահի թեկնածու եւ «ռազմական եւ արտակարգ դրության» պայմաններում նախագահի ընտրություններ անցկացնելուն: Այս երկու իրավական հարցի անտեսմամբ առաջին նախագահը համոզված է, որ ՍԴ-ն ական է դրել Սերժ Սարգսյանի լեգիտիմության տակ: Մեկնաբանելով ՍԴ-ի որոշումը Լեւոն Տեր-Պետրոսյանը շեշտեց, որ ՍԴ-ի 19 էջանոց որոշումը վերաբերվում է մանրամասներին, մինչդեռ վերոնշյալ երկու գլխավոր խնդիրները անտեսվել են. «Եթե անդրադառնային այս երկու հարցին, պիտի ներկայացնեին մի հեղհեղուկ մեկնաբանություն, այն դեպքում, երբ այս երկու հոդվածը մեկնաբանության ենթակա չէ, ոչ մի դատարան իրավասու չէ մեկնաբանելու այս երկու հոդվածը, սրանք միանշանակ հոդվածեր են: Կատարելու էին մի մեկնաբանություն, ինչպիսին արել է Դավիթ Հարությունյանը, բայց այնքան հեղհեղուկ են եղել նրա մեկնաբանությունները, որ դատարանը դա չի ներկայացրել որպես իր կարծիք, ուղղակի տվել է որպես պատասխանողի կարծիք, որեւէ վերաբերմունք, գնահատական չի եղել: Կարող էին ասել` մենք համաձայն ենք Դավիթ Հարությունյանի մեկնաբանությանը կամ իրենց մեկնաբանությունը տալ, եթե սա չեն արել, սա արդեն իրավաբանական կատեգորիա է, եթե իմ հարցադրմանը չեն պատասխանել, դա ունենում է ապացույցի նշանակություն, իմ հարցադրումները ապացուցված են` իրավաբանորեն դա է նշանակում»: Լրագրողի դիտողությանը ի պատասխան, թե ՍԴ-ն պարզաբանել է, թե չպետք է քննի օրենսդրական վեճերը, որ դրանք վարչական դատարանում պետք է վիճարկվեն, Լ.Տեր-Պետրոսյանը նկատեց. «Գուցե զուտ իրավական առումով նրանք ճիշտ են ու նման ընթացակարգ կա, որոշ հարցեր վերաբերում են վարչական դատարանի իրավասությանը, բայց այս երկու հարցերը միայն ՍԴ-ին էին վերաբերում, ուրիշ ոչ մեկին, եւ ինձ համար մանրամասները կարեւոր չեն»: ՍԴ-ն Հայաստանի այն վերջին իրավական ատյանն էր, որտեղ կարելի էր բողոքարկել ընտրությունները, դրանից հետո ի՞նչ իրավական քայլեր է պատրաստվում անել Լ.Տեր-Պետրոսյանը. «Եվրոդատարանը չի ընդունում նախագահի ընտրության արդյունքները վերանայելու վերաբերյալ հայցեր, բայց կան ուրիշ խնդիրներ, որ կարելի է դիմել Եվրոպական դատարան. բարձրացնել մարդու իրավունքների պաշտպանության, քաղաքացիների ընտրության իրավունքների խախտման խնդիրներ` մարդիկ ձայն են տվել` այդ ձայները գողացվել է նրանցից, եւ բազմաթիվ այլ հարցեր»:
Առաջին նախագահը նաեւ տեղեկացրեց, որ քաղաքապետարանը մերժել է իր դիմումը ամսի 21-ին Ազատության հրապարակում հանրահավաք անցկացնելու վերաբերյալ. «Մերժելու նման պրակտիկա գոյություն չունի, կարող էին մերժել այլ կերպ` Ազատության հրապարակը հարմար չէ, մենք ձեզ տրամադրում ենք այլ վայր, մերժման ուրիշ հիմք չկա, դա էլ չեն արել, ընդհանրապես են մերժել»: Արդյո՞ք սա նշանակում է, որ իշխանությունները նպատակ ունեն ընդդիմության գործողությունները մտցնել փակուղի. «Այո, դա է նշանակում. մենք հիմա կդիմենք հաջորդ օրվա համար` մարտի 22-ի համար, թող էլի մերժեն, մարտի 23-ի համար», իսկ կլինե՞ն «չարտոնված» հանրահավաքներ, եթե անընդհատ մերժեն, Լ.Տեր-Պետրոսյանը պատասխանեց. «Անընդհատ ինչքա՞ն պիտի մերժեն, չեն կարող, գուցե ուրիշ ձեւ գտնեն` պարզապես կերկարացնեն արտակարգ դրությունը, իրենց պետք է եւս 20 օր` մինչեւ ապրիլի 9-ը հանրահավաք չլինի: Բայց մենք չիրազեկված հանրահավաք չենք պատրաստվում անցկացնել»:
Միջազգային հանրությունը պետք տեր կանգնի իր իսկ պահանջներին
«ԺԵ»-ի հարցին, թե ինչպե՞ս է Լեւոն Տեր-Պետրոսյանը վերաբերվում շրջանառվող այն լուրերին, թե Հայաստանի իրավապահ մարմինները պատրաստվում են նրան քրեական մեղադրանք ներկայացնել, մասնավորապես ՀՀ արդարադատության նախարար Գեւորգ Դանիելյանը «Ֆրանսպրես»-ին նման կարծիք էր հայտնել, այս առիթով Առաջին նախագահը նկատեց. «Այդպիսի բաներ նրանց մտքներով անցնում է, նրանց մտքով անցնում է` քեզ էլ ինչ-որ ձեւով չեզոքացնեն...»: Մեր հաջորդ հարցը վերաբերում էր հայ-ադրբեջանական շփման գծում վերջին օրերի լարվածությանը, թե ինչ անդրադարձներ կարող է ունենալ ԼՂ-ի խնդրի վրա եւ հետեւանքներ Հայաստանի համար, ռազմական դրություն հայտարարելու հնարավորությունը որքանո՞վ է իրական. «Շատ ցավալի էր վերջին լարվածությունը, համենայնդեպս զինադադարի հաստատման 14 տարվա ընթացքում սրանք ամենալուրջ խախտումներն են` ըստ արտասահմանյան անկախ աղբյուրների, իսկ դա արդեն լուրջ փաստ է: Մոտիվների մասին չեմ ուզում խոսել, հնարավոր է, որ Ադրբեջանում, ոչ ամենավերին ատյաններում, մարդկանց թվա, որ Հայաստանը թուլացած է, ինչ-որ ներքին քաղաքական լարվածությունը կոտրել է կառավարելիությունը, կարող էին թեկուզ հետախուզական քայլի դիմել, տեսնելու, թե ինչպիսի դիմադրություն կլինի, հնարավոր է: Խոսվում է նաեւ հայկական կողմի մոտիվների մասին: Չեմ ցանկանում ենթադրություններ անել: Ասում են` միգուցե Հայաստանի իշխանությունները շահագրգռված էին Հայաստանի ներքին խնդիրներից շեղել հանրությանը: Չգիտեմ, տեղյակ չեմ: Բայց փաստը արդեն մտահոգիչ է, որովհետեւ վերջին 14 տարվա մեջ զինադադարի ամենալուրջ խախտումն է արձանագրվել», - հայտարարեց Լեւոն Տեր-Պետրոսյանը: Միջազգային հանրությունը անընդմեջ կոչ է անում, հորդորում է` «բոլոր կողմերի միջեւ երկխոսություն սկսել», խիստ կարեւորում է այդ գաղափարը. այս ընթացքում որեւէ փորձ այդ երկխոսությունը սկսելու վերաբերյալ եղե՞լ է, կա՞ նման հնարավորություն` այս հարցը ուղղեցինք Առաջին նախագահին. «Միջազգային հանրությունը լուրջ հանրություն է, նրանք երբեք դատարկ կոչ չեն արել, նրանք դրել են օրակարգը` չորս կետ, հինգերորդը` երկխոսության վերաբերյալ. ես ՍԴ-ում հայտարարել եմ` այս օրակարգով, հենց այս պահին ես պատրաստ եմ, խնդրեմ` սկսենք երկխոսությունը: Մեր կողմը ընդունել է, մյուս կողմը դա չի ընդունել: Իշխանությունները դա դնում են մի կողմ, վերացական` շոու, կլոր սեղանի մասին են խոսում, մյուս կողմից շարունակում են ձերբակալությունները: Չեմ տեսնում նրանց կողմից որեւէ լուրջ դիրքորոշում, մինչդեռ մեր դիրքորոշումը շատ լուրջ է: Մենք չենք հնարել, մենք չեն ստեղծել, մենք չենք հուշել` ԵՄ նախագահությունը ինքը նշել է, թե ինչ օրակարգով երկխոսություն սկսենք, մենք համաձայնել ենք: Հիմա թող ԵՄ-ն բարի լինի տեր կանգնել իր առաջարկին, շարունակի պնդել պահանջը: Ես անընդհատ հանդիպում են նրանց հետ, ասում եմ` ես ձեզանից ոչինչ չեմ ակնկալում, դուք եք ընկել թակարդը, դուք եք առաջարկել` տեր կանգնեք: Ասել եմ, որ սա ձեզ համար էլ է քննություն, կտեսնենք, թե որքան լուրջ եք վերաբերվում, որքան եք պնդում ձեր իսկ առաջարկը»:
Եթե Լ.Տեր-Պետրոսյանը չի ընդունում այս իշխանություններին, ապա երկխոսությունը ինչ հարթությունում կարող է լինել` հետաքրքրվեց լրագրողը. «Այդ կետերն են` ուրիշ հարթություն գոյություն չունի, եւ դա ես չեմ ձեւակերպել. ոչ մի նշանակություն չունի ես ընդունում եմ իշխանությունների լեգիտիմությունը, թե ոչ, իշխանությունը կա, դա քաղաքական ֆակտոր է, նշանակություն չունի` ընդունում ես, չես ընդունում, դու կարող ես նրա հետ բանակցել, աշխարհը երկար ժամանակ չէր ընդունում Յասեր Արաֆաթի լեգիտիմությունը, բայց նրա հետ խոսում էր, աշխարհը այսօր չի ճանաչում ԼՂ-ի ղեկավարի լեգիտիմությունը, բայց նրա հետ խոսում է, այսինքն` եթե քաղաքական ֆակտոր կա, քաղաքական ֆակտորի հետ պետք է խոսել, պետք է հաշվի նստել: Ես Սերժ Սարգսյանի լեգիտիմությունը չեմ ընդունելու հինգ տարի, բայց դա չի նշանակում, որ ես նրա հետ չեմ խոսի` կա մարդը, իշխանություն ունի, լծակներ ունի, ինչպե՞ս կարող ես նրան անտեսել: Ինքն էլ ինձ չի կարող անտեսել, իմ հետեւում էլ ժողովուրդն է, առայժմ անտեսում է` ոչինչ, վաղ թե ուշ, ուզած-չուզած հաշվի կնստի»: Այսինքն` եվրոպական, միջազգային միջնորդական ջանքերը առայժմ ապարդյու՞ն են անցել` հետաքրքրվեց լրագրողը. «Ես այդպես չեմ կարող ասել, բավականին բանի հասել են: Այնպիսի գնահատականներ են տվել, որ դրանցից ետ նահանջել չեն կարող, եթե չավելացնեն քննադատության դոզան` այլեւս ետ գնալու տեղ չունեն»:
«Քոչարյանը ու Սարգսյանը շատ ավելի մտահոգ են, քան մեզանից
յուրաքանչյուրը»
Ինչ մեթոդներով է շարունակելու պայքարել Առաջին նախագահը` հարց ուղղեց լրագրողը. «Ես հիմա մեկ միջոց ունեմ պայքարելու` կլինի հնարավորություն հանրահավաքներ անցկացնելու` կանցկացնենք, մամուլը կբացվի` կօգտագործենք մամուլը, կօգտագործենք հանրահավաքները, բոլոր օրինական միջոցները. այն, ինչ արել ենք 5 ամիս: 5 ամիս մեր կողմից որեւէ խախտում տեղի չի ունեցել, այդքան երթեր եղան, այդքան մեծ հանրահավաքներ անցկացվեցին, որեւէ երթի ժամանակ որեւէ մեքենա չքերծվեց, ապակի չկոտրվեց. ի՞նչ պատահեց, որ մեր ժողովուրդը մեկ օրում փոխվեց` մի բան պատահեց` մահակներով հարձակվեցին, հետո տարերային բողոք սկսվեց` հավաքվեցին ֆրանսիական դեսպանատան մոտ, հայտնվեցին սադրիչներ, սկսվեց պրոցես, որը կառավարելիությունից դուրս եկավ, բայց ես վստահ եմ, որ այդ պրոցեսը հրաշալիորեն, փայլուն կերպով կառավարվում էր իշխանությունների կողմից: Ես նաեւ վստահ եմ, որ եթե հիմա էլ լինեն հանրահավաքներ, եթե իշխանությունները մահակ չկիրառեն, ոչ մի հասարակական կարգի խախտում տեղի չի ունենա, ինչպես 5 ամիս չեղավ, հինգ տարի էլ հանրահավաքներ անցկացվեն` չեն լինի: Ի՞նչ պետք է ասեմ ժողովրդին` պետք է ասեմ, որ չեմ ընդունում այս իշխանությունների լեգիտիմությունը: Բոլոր քաղաքակիրթ միջոցներով պիտի պայքարենք այս իշխանությունների դեմ` հստակ, անզիջում. մեր կարծիքի կամ կամքի փոփոխության պարտադրանքի մենք չենք ենթարկվի: Սահմանադրությամբ մեզ ոչ ոք չի կարող ստիպել փոխել մեր կարծիքը, դա իմ իրավունքն է: Ոչ, քաղաքական լարվածության մենք չենք գնում, բռնությունների մենք չենք գնացել եւ չենք պատրաստվում գնալ», - հայտարարեց առաջին նախագահը` նշելով, որ եթե հանրահավաքներ թույլ չտան, դարձյալ DVD-ի տարածմանը կանցնեն, ասելիքը ժողովրդին այդ կերպ կհասցնեն, մանավանդ որ` ժողովուրդը վարժվել ու անհամբերությամբ սպասում էր դրանց: Ինչ վերաբերում է իշխանությունների կողմից «ուղեղների լվացման» մարտավարությանը` Լ.Տեր-Պետրոսյանը գտնում է, որ այդ կերպ հասարակությանը հնարավոր չէ խաբել. «Կարող էին խաբել, եթե վերջին 6 ամսվա իրադարձությունները չլինեին. այսօր մենք ունենք լրիվ ուրիշ հասարակություն, ուրիշ ժողովուրդ, քան ունեինք 6 ամիս առաջ. ես սա համարում եմ մեր ամենամեծ նվաճումը, ինձ եթե այլեւս ոչ մի բան չհաջողվի, այն, ինչ որ եղավ` ես համարում եմ իմ կյանքի ամենամեծ հաջողությունը, համարում եմ, որ իմ համակիրների, թիմի հետ մենք հրաշք ենք գործել` մենք ստեղծել ենք քաղաքացիական հասարակություն, գիտակից հասարակություն, ինտելեկտուալ հասարակություն, որի հետ ուզած-չուզած պիտի հաշվի նստեն: Ստեղծվել է մի հասարակություն, որը Ս.Սարգսյանը եւ Ռ.Քոչարյանը չեն կարող կառավարել: Ձերբակալություններով կարող է փորձեն չեզոքացնել մեզ, հիմա ամենասուր հարցը դա է` ձերբակալությունները շարունակվում են նույն թափով, ձերբակալությունները բացառապես քաղաքական ռեպրեսիայի բնույթ ունեն, ըստ էության, բախումների ոչ մի մասնակից չի ձերբակալվել, ձերբակալվել են միայն քաղաքական դեմքեր. ՀՀՇ-ի վարչության 70 տոկոսն է ձերբակալվել, մի մասն էլ թաքնվում է:
Իմ կենտրոնական շտաբից երեքն են ձերբակալվել, երեքը թաքնվում են: Իմ տարածքային շտաբների բոլոր ղեկավարներն են ձերբակալված. բոլոր այն մարդիկ, ովքեր ակտիվ են եղել այս ընտրությունների ժամանակ` ձերբակալված են, այսինքն` սա այնքան ակնհայտ է, որ աշխարհը շատ լավ հասկանում է, եւ սրա տակից դուրս չեն գալու. ինչքան շատ ձերբակալեն, այնքան դժվարացնելու են իրենց գործը: Իրենց թվում է` փակելու՞ են աչքերը: Ոչ: Քաղբանտարկյալը այսօր շատ հազվագյուտ կատեգորիա է: Քաղբանտարկյալներ շատ քիչ երկրներում կան: Այդ դարը անցել է: Իսկ Հայաստանը չունի Իրաքի ռեսուրսները. ոչ մեկի օգնության կարիքը չուներ Իրաքը, կարող էր իրեն թույլ տալ քսան տարի սահմանները փակել` նավթ ուներ, հաց ուներ, բրինձ ուներ, կարագ ուներ, ոչ մեկի օգնության կարիքը չուներ` կարող էր դիկտատուրա հաստատել: Հայաստանը չունի ռեսուրսներ, որ եւ քաղաքական հալածանքներ իրականացնի, եւ մարդու իրավունքները ոտնահարի, եւ ընտրությունների այսպիսի վայրագ միջոցառում իրականացնի. կախված լինելով ամբողջ աշխարհից` իրեն թույլ տա այդ տղայությու՞նը` չի դիմանա. Հայաստանի ոչ մի ռեժիմ չունի ռեսուրս դիկտատուրա հաստատելու, կարող է ինչ-որ ժամանակավոր խրախճանք լինի նրանց մոտ, բայց չեմ կարծում, որ խրախճանքի մեջ են այսօր: Ես վստահ եմ, որ Ռ.Քոչարյանը եւ Ս.Սարգսյանը այսօր շատ ավելի մտահոգ են, քան մեզանից յուրաքանչյուրը, որովհետեւ իրենք հասկանում են, թե ինչ են արել, ինչպիսի պատասխանատվության տակ են մտել` արյուն է թափվել, մեծ արյուն է թափվել եւ այդ արյան պատասխանատվությունը նրանք շատ լավ զգում են»:
«Ես ավելի լավ պատկերացում եմ
ունեցել այդ մարդկանց մասին,
քան նրանք կան»
Դեպքերի, իրադարձությունների նման ընթացք կանխատեսե՞լ էր Առաջին նախագահը մինչեւ հանրահավաքների անցկացումը եւ որեւէ սխալ եղե՞լ է այս ընթացքում` հետաքրքրվեց լրագրողը. «Ոչ, այսպիսի ընթացք ես չէի կանխատեսել, ռացիոնալ հարթության վրա ես չէի պատկերացնում, որ այսպիսի բան հնարավոր է. Ռ.Քոչարյանը գնացող նախագահ է` իրեն բացարձակապես պետք չէր այսպիսի պատասխանատվության տակ մտնել, իսկ Ս.Սարգսյանն էլ եկող նախագահ էր` նրան էլ պետք չէր այսպես սկսեր իր հինգ տարվա իշխանավարումը: Ես մոտեցել եմ մեր երկրին ռացիոնալ կատեգորիաներով. այստեղ կարող եք ասել, որ սխալվել եմ` մեր երկիրը շատ ավելի վայրագ է, քան մեր կատեգորիաներով էինք դատել, համարեք, որ սխալվել եմ: Այսինքն` սխալս եղել է զուտ փիլիսոփայական մակարդակի` ես ավելի լավ պատկերացում եմ ունեցել այս մարդկանց մասին, քան նրանք կան»: Իսկ մարդկային փոխհարաբերություններում իրեն դավաճանելու դեպքեր` մասնավորապես վերջին ընտրությունների փուլում, եղե՞լ են. «Ես երբեք չեմ համարել, որ ինչ-որ մեկը ինձ դավաճանել է, նաեւ 1998թ.-ին, այո, Վազգեն Սարգսյանի, Ռ.Քոչարյանի, Ս.Սարգսյանի հետ լուրջ տարաձայնություն ունեցանք` կարեւորագույն խնդրի շուրջ, ես հեռացա, տվեցի հնարավորություն, որ իրենք լուծեն, ոչինչ չարեցին, ավելի փչացրեցին գործը, բայց ես դրանից բացարձակապես չեմ ուրախանում, դա մեր ողբերգությունն է, այսօր մենք հավասար ուժ չենք Ադրբեջանի հետ, այն ժամանակ հավասար էինք: Սակայն ես երբեք չեմ համարել, որ որեւէ մեկը ինձ դավաճանել է, մենք ընդհանուր գործ ենք արել. դավաճանությունը միայն մեկ դեպքում է լինում` եթե երդվում են: Ոչ ոք ինձ երդում չի տվել, եթե երդում չես տվել` դավաճան չես, քո ճանապարհն ես ընտրել եւ պարտավորություն իմ նկատմամբ չունես: Այլ ձեւով եմ ես ասել. եթե Արթուր Բաղդասարյանը չմիանա Շարժմանը` նա կդավաճանի շարժմանը, իր ժողովրդին` ոչ թե ինձ»:
Լեւոն Տեր-Պետրոսյանը ընդգծեց, որ չափազանց վայրագ ընտրություններ են անցկացվել, ինչի գնահատականը տրվեց ԵԱՀԿ/ԺՀՄԻԳ-ի վերջին զեկույցում. «1995-2007-ի ընտրությունների զեկույցները եթե գումարեք, այսքան խիստ, կոշտ զեկույց չի եղել: Սրանք երեւույթներ են, որոնք չեն կարող անտեսվել: Սա մեր իշխանությունները պիտի գիտակցեն ու ավելի չսրեն իրավիճակը: Բայց նրանց բոլոր քայլերը գնում են իրավիճակի սրման` այս անընդհատ ձերբակալությունները, այդ հայտարարությունը` արդարադատության նախարարի տեսակետի շուրջ, որ ասացիք, այդ բոլորը գնում են սրման, անընդհատ խոսում են երկխոսությունից, բայց ամեն ինչ անում են, որպեսզի դա խափանեն»: Իսկ միջազգային հանրության (ԵՄ, ԱՄՆ պետդեպարտամենտ) այս աննախադեպ ուշադրությունը Հայաստանի նկատմամբ ինչո՞վ է պայմանավորված. «Որովհետեւ Հայաստանում աննախադեպ վայրագություն է կատարվել. եթե այսպիսի ընտրություններ չլինեին, եթե այս արյունահեղությունը չլիներ, նման ուշադրություն չէր լինի»` շեշտեց Առաջին նախագահը:
Ի՞նչ հիմնավորմամբ է Լեւոն Տեր-Պետրոսյանը արտակարգ դրության երկարացման հնարավորությունը իրական համարում. «Իշխանությունները երբեք էլ չեն հավատացել, որ հանրահավաքները ինչ-որ վտանգ են ներկայացնում հասարակական կարգը խախտելու առումով, մեզ թույլ չեն տալիս այլ պատճառով. հիմա Ս.Սարգսյանը վերջապես ստացավ օծում` ՍԴ-ի կողմից, նա ուզում է թագադրվել ապրիլի 9-ին: Ինչ կստացվի, եթե հանկարծ, մարտի 21-ին 300 000 մարդ կանգնի հրապարակում, վանկարկի` «Սերժիկ, հեռացիր», դա կնշանակի, որ ժողովուրդը չի ընդունում ՍԴ-ի որոշումը, ժողովուրդը չի ճանաչում այդպիսի նախագահ, դա անթույլատրելի է` մտածում են գոնե հասցնեն մինչեւ ապրիլի 9-ը, հետո ինչ կլինի-կլինի: Սակայն աշխարհը այլ կերպ է դատում` դատարանը ինչ վճռի, դիտորդները ինչ գնահատեն, եթե ժողովուրդը չի ընդունում այդ իշխանությունը` դրա հետ են հաշվի նստում: Այժմ ժողովուրդը չունի հավատ իշխանությունների նկատմամբ, սա է ամենակարեւոր հարցը. չի ընդունում` սա ծանր բան է Սերժ Սարգսյանի համար, ես նրան կարեկցում եմ` բարեկամաբար»:
Ինչու՞ մարտի մեկին Առաջին նախագահը չընդունեց Վեհափառին, հարց ուղղեց լրագրողը` կարծիք հայտնելով, թե գուցե այդ դեպքում բախումներ չլինեին. «Ես բախումների հետ ի՞նչ կապ ունեմ: Ժողովուրդը հավաքվել էր` եկան մեկ անգամ «բախեցին», հետո այդքանով չբավարարվեցին մեկ անգամ էլ «բախեցին», երրորդ «բախելը» ես թույլ չտվեցի` ժողովրդին ցրեցի: Վեհափառին չեմ ընդունել շատ պարզ պատճառով, որովհետեւ սխալ հասցեով էր եկել, նա պիտի գնար նրա դուռը` ով «բախել» էր ժողովրդին», - նշեց առաջին նախագահը: Մարդու իրավունքների պաշտպան Արմեն Հարությունյանի վերաբերյալ վերջերս Ռ.Քոչարյանի հայտարարության առիթով առաջին նախագահը չցանկացավ գնահատական տալ. «Դուք գնահատեք: Ռ.Քոչարյանը այդպիսի բնավորություն ունի. մարդը աշխատում է, պաշտոն ունի, երբ իրեն տհաճ բան է ասում, երկրորդ օրը նա կարող է գոյություն չունենալ, Ջհանգիրյանը մի հայտարարություն արեց, մեկ րոպե հետո աշխատանքից ազատեցին, մեկ օր հետո ձերբակալեցին, տասը դիվանագետներ հայտարարություն արեցին, նույն պահին նրանք հեռացվեցին աշխատանքից, Սահմանադրության խախտումով նրանց կոչումներից զրկեցին: Արմեն Հարությունյանը կարող էր 100 տարի աշխատել, եթե այսպիսի հայտարարություն չաներ, Լարիսա Ալավերդյանը մեկ-երկու փաստ ներկայացրեց` նույնը նրա նկատմամբ: Այսինքն` Ռ.Քոչարյանը ամեն օր ապացուցում է այն, ինչ ես հինգ ամիս ուզում էի ապացուցել ժողովրդին»: Եթե իշխանությունները արտոնեն հաջորդ հանրահավաքը եւ Լեւոն Տեր-Պետրոսյանի առջեւ դարձյալ դրվի նույն պահանջը` պետական պահպանության ծառայությունից հրաժարվել կամ տնից դուրս չգալ, ինչպես նա պետք է վարվի. «Նախ դա անօրինական պահանջ է, ոչ ոք չի կարող դնել իմ առջեւ նման պահանջ, դա օրենքն է սահմանել, եթե անգամ ես միայնակ դուրս գամ, ինձ պետք է ձերբակալեն, թույլ չտան, ետ բերեն, այսինքն` ես միայն պահպանությամբ կարող եմ դուրս գալ: Ինչի՞ համար է այդ օրենքը սահմանված` նախ ես գաղտնիք կրող եմ, երկրորդը` նախկին նախագահի անվտանգությունն է, որը երկրի հեղինակության, պատվի հարց է, այնպես որ` նման պահանջը միանգամայն ապօրինի կլինի», - եզրափակեց Լեւոն Տեր-Պետրոսյանը: